The Distrikt Libro Werde can now be accessed in furlan di Teôr (the Friulian language as spoken in Teôr). Many thanks to Massimiliano Ghiro for the translation!
1. Introduzion.
Nom dal Distrikt: Libro Werde.
Nom dai abitants: Libro Werdeoidi, Werdoidi (e atris)
La lenghe dal Distrikt a è di origjine gjermaniche-latine. A presente une vore di peraulis forestis, parzeche a coventin un grum.
Il nom modern dal distrikt Libro Werde leteralmentri al voul dî “mont libâr”.
Ma il significât dal siò antîc nom origjinâl a nol è clâr. Il nom vieri al è “il Orb Werte” e tra lis diviarsis interpretazions i podìn ricuardâ: “la sfere preziose”, “il globul vert” e “valôrs zircolârs”.
I lenghiscj a àn notât ancje une coinzidenze lenghistiche. In spagnôl “libro verde” al voul dî cjarte verde. I libris verts a son “publicâts par stimulâ la discussion su determinâts argoments. A invidin lis parts interessadis (ents o individuis) a colaborâ ta un prozess di consultazion. E a discuti davôur a lis propuestis che a fasin”.
Libro Werde al è une identitât e une comunitât. A è componude di comunitâts soreponudis, pì che di un Distrikt unitari. A à la siô tiare, ma a à ancje une diaspore. Un grum di Libro Werdeani a vivin t achei atris Distrets.
Libro Werde al cumprint comunitâts di azion, comunitâts di pratiche, comunitâts di interess, comunitâts di finalitât e comunitâts di ricerche. Chistis comunitâts a van une disore chê atre. In gjenerâl, la gran part dai Libro Werdeoidi a àn un desideri comun: a àn voe di sperimentâ, pì che dome esisti.
Il moviment, la curiositât e il progres a son carateristichis che a definissin la culture di Libro Werde. A è nade ancje une comunitât di louc. Chiste a insiore la vite da la int. Si po jessi braurôs di jessi un Libro Werdeoid. O un “Weirdo” come cualchi volte il nom al ven strambît dai aversariis.
Libro Werde al è inclusîf. Se tu ti sintis un membro, alore tu sês un membro. A nol è projodût nissun tipo di control o filtro, a part cualchi câs di dirit zivîl, comerciâl e penâl. Tu sês ancje libâr di lâ vie in ogni moment. Sie mentalmentri che fisicamentri. A no covente nissune declarazion par gjavati four.
Libro Werde al è une societât basade su un alt nivel di fiduze, bass nivei di gjerarchie e di distanze dal podê. Chistu al aumente il fluss di informazions e il scambi di ideis. Sicheduncje, a siô volte al fâs cressi inovazion e competitivitât.
La int a no à poure di tabaiâ di nuie, parzeche al è une vore difizil che a si vignedi cjolts vie par ze che a si dîs. I gnoufs tentatîfs tai afars, a la tecnologje e ta la societât a vegnin sbruntâts. Il faliment al è un onôr. Il faliment al ven zontât a la liste dai suzes. A è une esperienze di aprendiment preziose e un segn di coragjo. Il faliment di solit a nol compuarte vergogne.
Tantis scuelis di penseir a flurisin a Libro Werde. Il penseir sientific al comande. Il penseir sientific a nol è dogmatic. Invezit di fissâ rigjidamentri i penseirs a paradigmas imutabii, a si dopre la metafore di une ancure di mâr. Une ancure di mâr a rapresente il penseir di bon sens dai Libro Werdoids. La lungje cjadene da la ancure di mâr a permet un moviment svelt fin lì che a po, propit par la misure da la cjadene. Se il moviment al voless lâ pì in là di ze che al po, alore al ven ralentât, ma no cuietât dal dut. Al prevâl il bon sens. Dut câs, al ven considerât sientific jessi viarts a ze che a no si cognoss.
Libro Werde al è benestant, al sens che dome pôcs abitants patissin la fam o a son puars. Par chei che a no son bogns di fâ un lavôr convenzionâl, e par chei che a vuelin incanalâ lis lôrs energjiis in atre maniere, un sisteme di previdenze sociâl (sisteme di welfare) al garantiss bens di prime nezessitât e curis medichis. L’istruzion ta ducjus i nivei, da l’asilo al dotorât, a ven paiade dal Stât. Il contignût da la educazion a ven indrezade ma no zensurade, né masse controlade dal stât. Chistu sisteme al permet a cui che al voul di destinâ lis sôs energjiis ta la ativitât creative e mentâl, zenze vê di pensâ a la sopravivenze.
Jessi un Libro Werdeoid a nol preclût di vê ancje identitâts difarentis, fasint part di atris grups o Distrets.
2. Psicosociologjie
Un aspiet fondamentâl tal Libro Werde al è un cambiament che al è avignût ta la consapevoleze. Chistu al voul dî che la grant part da lis iniziativis sociâls, economichis e tecnologjichis tal Libro Werde a vegnin gjestidis di une zerte porzion da la popolazion. Chistis a son personis che a son doventadis “distacadis” (“unstucks”). A si intint personis che a no son blocadis tai lôrs môts e ta la lôr maniere di pensâ. Si trate di cambiaments cruciai, che a suzedin a nivel mentâl e intangjibil.
Cun “Distacât” (“Unstuck”) i intindìn: i “vecjus môts di pensâ”, lis “vecjiis convenzions”, i “vecjus contrats sociai” di decenis e secui passâts a son jodûts come imprescj che a vevin une lôr finalitât ta une volte. Cualchidune da lis vecjis robis a podin servî ancjemò tal dì di vuê. Atriis a saràn siguramentri utilis ancje in futûr. Ma la nostalgje a no è un sentiment sintût pì di tant. Lis “vecjis manieris” a no son cjapadis in automatic come normis a cui aspirâ.
Libro Werde a son une societât e une popolazion in transizion. Al somee avonde a un pizul stât nazionâl da l’emisferi setentrionâl dal 21° secul sul planet Tiare. La fonde da la economie pulitiche a è liberâldemocratiche, socialdemocratiche o tecno-democratiche, a seconde dala prospetive.
Al è però un presi psicologic di paiâ par inovâ e par fâ une zernite da lis robis vecjis. Par creâ robis gnovis si scugne inevitabilmentri ancje distruzi il vecjo sisteme. O amancul scartâ parts dal vecjio sisteme. Crodi in sistemis e valôrs rigjits al po puartâ a un sens di sigureze e stabilitât. Ma il presi di chistu a è la libertât. La fazile sigureze da la rigjiditât e dala soliditât no è difarente di chê di un frutin che desideree la atenzion e la cure di une figure gjenitoriâl (fisiche o metaforiche). Ma intant che al oten stabilitât e curis, il frutin al è ancje a la mercé dai mateçs dal gjenitôr.
Si scugne sopuartâ il dolôr di rinunzâ a la fazile e semplizistiche sigureze psicologjiche se a si voul jessi libars. Libars di esplorâ lis potenzialitâts dal mont. Chistu al è il salt psicologjic che tancjus Libro Werdeoidi a àn fat. Al è chistu che al permet l’esistenze dal Distrikt ta la sô forme atuâl.
La grant part dai Libro Werdeoidi a son passats, par vie di un tâl prozess di rinunze, al desideri di une stabilitât rigjide e restritive. A son rivâts a un gnouf ecuilibri. In chistu gnouf ecuilibri a no si fâs afidament sul supuart esterni (il stât, lis tradizions da la societât, la figure dal gjenitôr, o alc di simil). Invezite, a si jodin come atôrs libars e consapevui. A no son pì blocâts in valadis mentâlis restritivis. A son doventâts marinârs e subacui, in tun vast mâr di possibilitâts.
Cualchidun di lôr a son rivâts al lôr gnouf ecuilibri par vie da la filosofie. Atriis grazie a la meditazion zen. Atriis ancjemò semplizementri a ‘nt jodin la razionalitât. Atriis a son nâts in fameis inteletualmentri curiosis. Zierts a son stâts perseguitâts o discriminâts. Atris a àn sperimentât pericui o traumas, che a la fin a i àn permitût di cjalâ lis robis di ovis prospetivis. Cualchidun al à scjavazât une crisi personâl, e da la crisi a àn otignût lis intuizions di che a vevin bisugne per sleâsi dal vecjo.
Libro Werde a si è evolût ta une societât che a eliminedi la inerzie in maniere ative. A son atents a no fâ afidament su sistemas legacy che a no coventin. Di atre bande, i sistemas legacy che a funzionin ben a vegnin mantignûts e tignûts di cont.
Al esist un prozes dezisionâl razionâl. Chistu sisteme dezisionâl al ten cont dai numars, dai sentiments e da la empatie. Il prozes dezisionâl e la eliminazion da la inerzie sociâl e mentâl a domandin un vore di sfuarçs. Ma i Libro Werdeoidi a pensin che al sedi fondamentâl. Par no jessi indurmidîts un futûr doman.
Il potenziâl del svilup uman al è moltepliç. I lengaç da la economie convenzionâl e da lis sienzis sociâls a no podin descrivi in môt adeguât i pussibii percors futûrs. No zenze limitâ la creativitât umane.
Ma vê ponts di viste progressiscj intal svilup uman e rifiutâ lis tradizions a no son recuisîts par vivi tal Libro Werde. La gran part dai ponts di viste a son tolerâts. La varietât a ven jodude come un pont di inovazion. Ancje tancjus conservatôrs politics e sociai a vivin a Libro Werde. Cualchidun di lôr al è locâl, atris a son imigrâts di atris distrets.
Ma la fuarze trainante dal suzes di Libro Werde a è une popolazion inteletualmentri curiose, malcontente, in part ancje nerd. A preferissin la sperimentazion a la sigureze. Alcuni Libro Werdeoidi a son parfin transumaniscj, ma la gran part no. A podin jessi descrits semplizementri come amants da la inovazion.
3. Modei di cooperazion.
Il lavôr di grup (o di trop) viars interes condividûts al è une modalitât di funzionament di fonde. Telâr da la societât Libro Werdeiana. I compîts da lis personis intal lavôr, intai grups e intai ambients sociai a son relativamentri fluits e transitoris. Se al covente, a si podin vê difarentis identitâts soreponudis contemporaneamentri, e a si pò passâ di une bande a chê atre.
La inclusion a è la norme tal Libro Werde. In tune vore di atris societâts il gatekeeping e l’esclusion a son dispes la modalitât predefinite. In chistis societâts tu scugnis dimostrâ o cualificâti par fâ part di un grup. A Libro Werde a si è membros se a si SINT di jessilu. Al è ancje biel jessi un membro. Ma tu sês ancje libâr di fâ lis tôs robis, di jessi indipendent e di restâ in bande. La vuestre sielte a ven rispetade.
Il pont di partenze di chiste politiche no è une etiche dai brazecuei di grup. Al è logjic che pì a si ven includûts, pì sioris a doventin lis ideis e lis risorsis. La pluralitât e la varietât a aumentin lis possibilitâts di creâ gnovis e frutifar combinazions di metodos, iniziativis, ativitâts, tecnologjis e impresis. Chistu al funzione une vore ben ta un ambient cun un alt nivel di istruzion, un crissint nivel di automazion e cuant che la tecnologjie e lis competenzis a son bondantis.
La cuncurinze a po jessi utile come stimul e catalizatôr di energje e eficienze. Ma la cuncurinze a no è un dogma che al scugne jessi simpri seguît. Une strente cooperazion reziproche, al puest da la cuncurinze, a po jessi pì produtive. A seconde da la situazion.
Un esempli concret: Libro Werde al organize tancjus hackathon par stimolâ ideis e combinazions. A son inzentîfs par i top performer e premios par i vinzidôrs. Ma ancje i “vinçûts” a no vegnin escludûts. Il lôr interes e la lôr energje passionade a vegnin sfrutâts includint ducjus chei che a vuelin contribuî ai progjets vinzidôrs. O continuâ i siei progjets dopo il concors. La grant part dei contribûts a vegnin tirâts su e ricumbinâts, per creâ daspò risultâts ancjemò miôrs. Lis ideis e lis cugnussinzis a no vegnin straçadis. Invezit la cugnussinze che a è stade gjenerade a ven notade, coltade e ricombinade. La informazion a ven coltade e tignidu di cont. Par dut il timp a si fâs atenzion a no zensurâ o manipolâ lis informazions.
Chel che al funzione ben, di solit al ven cundividût cun libertât e in maniere ative. Lis miôrs pratichis a no son tignudis come segrets par pizui trops di int. Invezit, i risultâts e il know-how i solit a son condividûts. Chistu parzeche in gjenerâl, la “torte” a doventarà pì grande per ducjus se lis informazions a vegnin cundividudis invezit di ingrumâlis. (Un esempli concret di zontâ ochì)
I diferents grups di interes a vegnin judâts a organizâ lis lôrs ativitâts cun imprescj vore di grup e atris imprescj organizatîfs. (Un esempli concret di zontâ ochì)
I diferents grups di interes a vegnin judâts ancje a federâ lis lôrs azions. Chei che a jodin un benefizi tal coordinament gjenerâl a podin unîsi a entitâts pì grandis (grups).
Imprescj concrets
Organizazion dai compits
I metodos di progjetazion dai servizis a vegnin doprâts ta une vore di nivei da la societât, par rindi la cooperazion pì fluide. I obietîfs pì grancj e i grancj progjets a podin jessi ripartîts in compits pì pizui. Ancje pizulons. A esistin une vore di imprescj pratics, metodos e servizis, che di norme a vegnin doprâts e svilupâts ulteriormentri. I imprescj a permetin un flus di lavôr, dolà che il lavôr ad alte intensitât di cugnussinze al è dividût in compits pì pizui in maniere valide.
Contribûts e economie
Lis personis a podin ufrî il lôr timp e i lôrs sfuarzs a gratis, ta chist câs la lôr ricompense a dovente semplizementri il coinvolziment ta la creazion di alc di util o impuartant. I lôrs noms o sorenoms a podin jessi menzionâts come colaboradôrs. Opur a podin sielzi di rizevi ancje dai credits, sot forme di gjetons. I gjetons a podin jessi doprâts par crompâ robis o servizis. I gjetons a podin ancje jessi prestâts e cjolts in prestit. Al ven dut segnât ta un regjistri gjenerâl dai gjetons e dai contribûts. A esistin copiis difarentis di backup par vuardiâ il sisteme. Ta la economie, il sisteme dai gjetons al esist in bande di un sisteme monetari pì tradizionâl.
(Su chistu argoment a si cjate alc di pì ta la Part 2).
Delegâ
A si doprin diferentis manieris par delegâ il lavôr e la responsabilitât. E i metodos a vegnin continuamentri inzornâts. Chistui metodos a tegnin cont da la psicologje e da lis motivazions personâls, cussì come lis dinamichis di grup. Une peraule clâf a è empowerment. Lis personis a son delegadis cun responsabilitât, fiduze e autonomie. A no vegnin controladis cun comants e coercizion. Dà fiduze a stize fiduze e spontanee cooperazion. E al manten la societât dinamiche e ad un alt nivel di fiduze.
I ziclos e il cronometragjo
Tal Libro Werde, ancje il timp al è pensât. I metodos di design a vegnini usâts par creâ calendaris di ativitâts ziclichis e flus di lavôr ziclics. Chistui a permetin une modalitât di lavôr reative. Par un forest al somee che i Werdoid a sedin organizâts in maniere aprossimative e imprezise ta la organizazion dal lôr lavôr. Ma a è une sielte consapevule. Lis opzions a son tignudis viartis e lis robis a vegnin tignudis separadis. Chistu al ven fat cussì che lis soluzions pì adatis e pì valevulis a vignedin four in maniere organiche.
Un dai paradigmas prinzipâi di Libro Werde al è il Loop. Invezit di une estension in linie rete viars il futûr, i ziclos di riscuntri e lis reiterazions a son dispes progjetâts e usâts in ducjus i tipos di ativitâts. Chistu si riflet ta la peraule che i Werdoid a usin par “progjet”.
La peraule progjet a derive dal verp latin proicere, “prime di une azion” che a sô volte a derive da pro -, che a indichee precedenze. Alc che al ven prime di alc atri tal timp. E iacere, “fâ”. La peraule “progjet” cuindi in origjine a voleve dî “prime di une azion”.(Wikipedia)
Tal vocabolari Libro Werde, la peraule doprade al puest di progjet a è dumject. A ven dal latin dum che al voul dî “durant, intant, fin a”, e iacere, “fâ”. Sicheduncje: “durant une azion”.
La zircolaritât o i loop a no intindin un alc di fer e un progres lent. Al è il môt Werdoid di fâ lis robis soredut fatis ben, la prime volte. E lì che a vegnin four erôrs o problemas, il sisteme di autocorezion di dumject al è lì. Zà dispunibil e in azion.
Chistu môt di prozedi a si manifeste in robis concretis come il calendari. Il calendari Werdoide al è une spirâl. Al progredis ta la tiarze dimension. Nol è un zercli bidimensionâl che al tornares al so pont di partenze.
Combinazion di interes e un pocje di storie
I Werdoidi a àn creât un sisteme di trops, e comunitât di interes e finalitât. E un grum di forum dolà che lis lôrs energjis e ativitâts a son ben incanaladis. I forum di discussion e i database di cugnussinze a son mitûts adun, in t’une struture user-friendly (o un cluster flessibil) di contignûts e interfacis. Chistu al zove par la ricerche, il business e la ativitât sociâl in timp reâl. Chiste a è la spine dorsâl (o esoscheletro) dal lôr efizent sisteme di inovazion.
Une prime version di chistu sisteme a erin lis plateformis di discussion radicalmentri viartis (par la epoche) vagamentri basadis sul sisteme Discourse. Chistis plateformis a erin instaladis su “Internet”. (Internet al ere il sisteme in rêt di comunicazion globâl, che tradizionalmentri a si pense che al sedi tacât ator dal 410227200 Old Werdoid Time).
Chistis plateformis di discussion “Internet” a sfluririn in dut il planet Tiare, cun varis nivei di suzes. Cualchidune a è stade creade di imprenditôrs a inizi cariere e da impresis aziendâls. Atris a erin misclizots di difarents argoments, progjets e comunitâts. A si riunivin in varis manieris e in varis ocasions, e dopo a si sparnizavin di gnouf. A voltis a ere une azion frenetiche e un dibatit pesant sui forum, e a voltis a erin luncs periodos di calme.
Lis clâfs dal suzes a erin la capacitât di eliminâ la distanze gjeografiche, e soredut la sielte di viartidure e trasparenze. Lis miôrs agregazions di comunitât a son doventadis gjenaradôrs di significât par i lôrs partezipants. I partezipants e i colaboradôrs a podevin sodisfâ i lôrs sens di curiositât, di podê e di comunitât.
Tal stes timp, lis comunitâts a podevin razunzi risultâts significatîfs tal trasformâ la societât in miôr. In diviarsis manieris che il guvier tradizionâl a nol podeve. La viartidure e la trasparenze radicâl dai forum a àn garantît la visibilitât su Internet. Pì personis continuavin a jessi coinvolzudis in maniere ative, ancje se i argoments domandavin un pesant sfuarz inteletuâl. Tantis da lis comunitâts online pì siaradis prin o dopo a àn clopât.
I partecipants e i colaboradôrs di chistis comunitâts a si son rindûts cont che a podevin viarzisi ad un nivel superiôr. A àn creât un gnouf pachet di servizis. Chistu pachet di servizis al consisteve tal creâ un forum simil par cualsiasi grup util o interessant di int che a desiderave vê un forum simil. A àn ancje insegnât come costruî une comunitât su la plateforme, e come gjestîle. Un servizi “clâfs in man”. A son stâts zontâts ancje elements di intrateniment, di zoucs e contignûts audiovisîfs. Chiste combinazion a à rindût il servizi un grant suzes.
I vari forum che a son stâts creâts in chistu môt, a àn tacât a cooperâ in maniere pì leade tra di lôr. Chistu al è stât fazilitât da l’ûs di soluzions tecnichis e plateformis similis in ogniun dai forum. I account dai utents a podevin jessi cundividûts tra lis plateformis: un al podeve regjistrâsi ta un sisteme, e cun chê regjistrazion vê azes ancje a la grant part di chês atris plateformis e forum.
Il flus di informazions al doventave pì eficaç e tempestîf, parzeche la int a doventave pì inmaneade e coinvolzude tal sisteme. Ancje i conflits inevitabilmentri a vignirin four, e a forin cualchi grup cun interes e credenzis contraris. Ma tal comples il sisteme al sflurì in t’une rêt di inovazion e creativitât. Al veve zentenârs di grops grancj e pizui a dut il mont. I interes e lis ativitâts a erin sindacâts in môt eficaç e sparniçât. In cualchi câs a erin ancje federâts sot di un sisteme decisionâl zentralizât, cuant che a si scugnive.
I discendents di chistis comunitâts associadis in maniere libare a àn fondât Libro Werde.
PART 2:
Su la dinamiche da la azion individuâl e coletive
Chiste part a fevele di come la azione creative individuâl e coletive a è organizade tal Libro Werde. Varis metodologjis e concets a son dispunibii, e atris a son in fase di ricerche.
Brainstorming come sfrutament dal caos
“Sageze dal moment”, “Epifanie” e “Intuizion” a son ducjus noms par gafâ il moment, grampâ une istantanee da la vision o da la intuizion. I Werdoidi a son brâfs in chistu, e a àn lavorât cun metodo par perfezionâ lis lôrs metodologjis di brainstorming. A smicjin a rivâ a chistui moments di intuizion, e a gafâ une istantanee dal moment e a regjistrâle. Cuant che une vision a è nade e regjistrade, dopo a lavorin per fâ chê vision, vâl a dî il “backcasting”.
I prims Werdoidi a si son rindûts cont di vê une gnove tecnologje (l’“Internet” e la ondade di tecnologjis che à abilitât). Chistis tecnologjis a permetevin di eliminâ lis distanzis. In part a eliminave ancje il timp, parzeche tancjus compits cumò a podevin essi completâts ta un colp. Une volte par chei stes compits a i volevin dîs o adiriture stemanis. Par esempli, la “pueste eletroniche” a ere une vore pì svelte “servizi puestâl” fisic.
Une societât digitâl viarte, cun alte fiduze e bas risc a è sfodrade di risorsis che a “flutuin ta l’aiar”. Al è pussibil doprâ chistis risorsis gratis, o cuasi. A si po fâ cussì, se a si à vonde comprension e avonde educazion. O se a si à vonde esperienze par savê cuâi elements sielzi e come metiju adun.
Ancje dopo che la tecnologjie digitâl di comunicazion e di calcul a son doventadis in maniere difondude dispunibii, la gran part dal rest dal mont a è restade tri da lis metaforis e dai paradigmas dal secul passât. O fintremai dal mileni passât: fabriche, cjastiel, sisteme feudâl. Gjerarchiis di podê rinfuarzadis e ricreadis dal lengaç.
La societât e il mont a erin in gjenar jodûts come un insieme di grancj dominis separâts l’un di chel atri: i oms diferents da lis bestiis, i oms diferents da lis feminis, i inteligjents diferents dai stupits, lis creaturis viventis diviars dai ents inanimâts, la citât diviarse da la campagne, une identitât lavorative vidude di une atre, la produzion dividude da la inovazion, i cjamps da la sienze claramentri distints tra di lôr, ecc.
Granularitât
I prims Werdoidi a pensavin che un ragrupament cussì aprossimatîf di robis e dominis al fos inteletualmentri flap. A àn adotât une vision pì granulâr dal mont.
A nivel filosofic, chistu l rive fin al parados dal discret vs. continuo. Cuale a esie la pì pizule unitât significative di cualsiasi robe, e cuale esie la massime granularitât significative? A esistin grâts e spetros di robis, o o cualchi robe a è claramentri dividude e difarente di chês atris (vâl a dî discrete)? Chistu al po ancje jessi esprimût ta une domande sul come e sul dolà a si vares di tirâ une rie lì che un fenomeno a si trasforme a chel atri. A cuale lungjeze d’onde il colôr zâl a si trasforme in vert, o il ranzon in ros? E cuant che a son pì lungjezis d’onde e colorôrs misturâts, zemôt lu clamino alore?
Jessint personis orientadis a la pratiche, ma ancje nerd, i Werdoidi a son consapevûi da lis implicazions filosofichis, ma a jodin ancje i benefizis concrets che a vegnin four da la maiôr granularitât tal penseir e ta la azion.
I Werdoidi a son brâfs a miorâ lis modalitâts di vore e a fasin continuis ricerchis per miorâ lis lôrs metodologjis di vore. Usant struments come il design dal flus di vore, il design dai servizis e il design dal timp, lis energjis creativis e produtivis a podin jessi imbrenadis e dopradis in môt eficaç.
Come regule gjenerâl, i Libro Werdean a dividin il lavôr in dôs modalitâts: la modalitât “manager” e la modalitât “maker”.
Il môt manager al consist gjeneralmentri in curtis e intensis esplosions di penseir, comunicazion, dezisions e atris azions. A si clame modalitât manager parzeche a somee a lis azions di un project manager oberât di voris: dezision rapide, dopo a si passe a risolvi il problema suzessîf, dopo il suzessîf, e cussì indenant. A vâl la pene notâ che il termin “modalitât manager” a si aplichee ancje ai compits svolzûts di bessoi. A no impliche par fuarze la gjestion di personis, ma pitost il tentatîf di gjestî un grant numar di compits.
La modalitât maker a consist in periodos di timp pì luncs fasint dome un compit, pensant in maniere pì lente, contemplant cun trancuilitât, stant concentrâts. Chistu tipo di modalitât di lavôr al è adat e nezessari par un lavôr analitic e creatîf pì profont.
Il microtasking al funzione ben ta la modalitât manager, cuant che a si aplichee il penseir svelt e lis regulis empirichis basadis su la esperienze. Cuant che lis regulis a son claris. Il microtasking al è doprât in Libro Werde par rindi la economie une vore eficaze. A diferenze di une dure linie di produzion fisiche tayloriste, il sisteme di produzion creatîf Werdoid al assegne microcompits interessants e gratificants a un trop di colaboradôrs. Chistu al ven fat mediant un sisteme flessibil, inteligjent e di aprendiment cun controi ed ecuilibri. I team virtuâi, i trops, a si riunisin par fâ da lis robis.
A voltis a àn un manager e a volts a son autonomos. La tecnologjie ven doprade cuant che a covente, ma a no si fâs masse afidament. I Werdoid a àn scuiart che i sistemis ibridos om-tecnologje offline e online a tindin a jessi eficaç. A voltis cjarte e pene a son la soluzion miôr, e a voltis une uniche app cjamade ta la interfaze da la gridele nervose. Ma pì sì che no, al è un misclizot di tecnologjie reative e organizazion umane che a à il miôr flus e bogns risultâts.
I colaboradôrs dal businâ a podin ancje, in cualsiasi moment, aumentâ il lôr coinvolziment, in môt no restâ blocâts in pizui compits ripetitîfs che a instupidissin il cjâf: une volte che a àn dimostrât la lôr abilitât in compits pì sempliçs, il sisteme ibrido al dà lôr la pussibilitât di lâ su di nivel. Par cjapâ compits pì grancj e comples.
A seconde da la situazion, l’adempiment di cualsiasi compit al è ricompensât cun avanzaments di ranc virtuâl (come i nivei ta un zouc), bêçs o gjetons. I gjetons a funzionin in maniere simile ai bêçs, ma a son pì adats a tornâ a investiju tal svilup personâl o tal svilup dal progjet. Chistu parzeche cun i gjetons a si po crompâ il lavôr mentâl di alte cualitât di atris Werdoidi. Lis personis a son obleadis e motivadis a dâti un input di alte cualitât. Adun cun alts nivei di istruzion e aprendiment continuo, il sisteme di microtasking Werdean al funzione avonde ben.
La granularitât a rivuarde ancje l’ûs eficaç dal spazi . I cunfins tra dominios relativamentri dividûts come la cjase, la buteghe, il ristorant e l’ufizi a son doventâts une vore confusionâts. Sì, lis cjasis privadis a esistin, ma la societât ad alte fiduze a permet un ûs flessibil dai spazis. La int a è relativamentri fiduzose e afidabile, e la condivision di parts dai spazis domestics a è cumune. Jessint pratics e curiôs, i Werdean a jodin chistu come une atre oportunitât par fazilitâ la comunicazion. A si podin creâ situazions dolà che lis personis a si cjatin e nassin ideis.
I ufizis che prime a restavin inatîfs al di four da l’orari di vore, cumò a son spazis multifunzionâi. A podin jessi doprâts dal dut par atris motîfs cuant che a no vegnin usâts. Tancjus spazis a son completamentri multifunzionâi, e il lavôr “ufizi” al à piardût il so significât. Naturalmentri, cualchi segret aziendâl e problemas di riservateze di R&S derivin da la cundivision. Ma i spazis di vore e i laboratoris a son progjetâts in môt di permeti l’ûs simultanei di pì int. Lis areis riservadis a son riduzudis al minim, e a son ben protetis, di maniere che la cundivision dai spazis a evitedi riscjos.
Un atri aspiet da la granularitât al è l’ûs efizent dal timp. Chistu al à ancje implicazions par la proprietât. Al è une vore pì eficaç in termins di risorsis cundividi pitost che vê.
Un esempli aprossimatîf: a si po sparagnâ timp personâl vint ducjus i imprescj ognun tal so capanon simpri. A son lì in spiete, e fazilmentri dispunibii cuant che a coventin. Ma i imprescj a podin ancje restâ lì zenze vignî doprâts ar esempli par l’80% dal timp. Cumò prove a pensâ a une situazion dolà che i imprescj a son in cundivision tra zinc personis, e al è un sisteme di cundivision dal timp une vore eficaç. Un capanon dai imprescj nem furnît cun un tas di ûs dal 100% al po contentâ zinc personis. Ma se dutis lis personis a vuelin vê la proprietât esclusive, vin zinc capanons cun un tas di ûs dal 20% parom. Chistu al voul dî cuindi vê cuatri capanons perfetamentri furnîts che a no vegnin doprâts par il 100% dal timp.
La lavorazion efizente a si oten cuant che la reson e la passion a son ben regoladis. Par regolazion, i Werdoidi a no intindin la soppression e la canalizazion rizide, ma un sisteme che al razunç un san ecuilibri. Il flus al po jessi progjetât. Podin doprâ pì capazitât mentâl cuntune programazion eficaze dai ciclos, di ativitât e i polze (par esempli, alenâ il nostri cjâf a eseguî sot-compits e “programas”).
Eseguî i compiti cun la fuarze brute o cun la paziente diligjenze a po jessi une valide soluzion in curt. Ma il môt inteligjent ed eficaç al è chel di lassâ lâ ogni compit zenze penseirs, fâ polzâ la cuestion, e tornâ pì tart cuntune gnove e difarente soluzion (iterazion).
Lis personis tal Distrikt a stan simpri imparant. Lis personis a son consapevulis da lis lôrs diviarsis modalitâts di ativitât, come la “modalitât manager”, la “modalitât maker” ecc. A son bogns di doprâ chistis modalitâts in maniere eficaze. Ogni persone a cognos lis sôs emozions. Chei che a àn dificoltâts cun une sane autoregolazion emotive, a podin seguî dai cors di formazion.
La ricerche Werdoid life design al è un sisteme a la avanvuardie dolà che il lavôr al è progjetât in tandem cun considerazions su lis reazions fisichis ed emotivis umanis. Il risultât al è un flus di vore dolà che il lavôr stes al dovente meditatîf.
Invezit di vê bisugne di recuperâ dopo il lavôr, lis miôrs sessions di vore a doventin gratificantis e a tirin sù il lavoradôr. I colaboradôrs a vegnin four di une session di vore sintintsi pì energjics, polzâts o rinfrancjâts di trop che a si sintivin a l’inizi.
A son diviarsis variantis di chistu sisteme. Lis comunicazions tra personis, scuadris, trops e sistemis a son progjetadis come un flus guidât ma naturâl. In chistu môt, il lavôr di scuadre e la comunicazion a doventin tal stes timp une opare d’art e un divertiment. Art performative di bande dai partecipants. Tal stes timp al è eficaç, produtîf e creatîf.
(Al continue)